విజయవాడ, ఆగస్టు 14 (ప్రతి ఉదయం ప్రతినిధి): మాజీ ముఖ్యమంత్రి వైఎస్ జగన్ మోహన్ రెడ్డిపై ఎంపీ కేశినేని శివనాథ్(చిన్ని) తీవ్రస్థాయిలో విమర్శలు గుప్పించారు. జగన్ మానసిక పరిస్థితి బాగోలేదని, ఆయన అసెంబ్లీకి రాకపోవడానికి భయమే కారణమని ఆరోపించారు.
ఏపీపీఎస్సీలో జరిగిన అక్రమాలపై అసెంబ్లీలో ప్రశ్నలు ఎదురవుతాయనే భయంతోనే జగన్ అసెంబ్లీకి ముఖం చాటేశారని కేశినేని చిన్ని విమర్శించారు. జగన్ ఒక తప్పిన విద్యార్థిలా అసెంబ్లీకి రావడం లేదని ఎద్దేవా చేశారు.

డీఎస్సీపై వైసీపీ తప్పుడు ప్రచారం

డీఎస్సీపై విద్యార్థులు, ఉపాధ్యాయులు కలిసి భారీ ర్యాలీలు నిర్వహిస్తున్నారని ఎంపీ తెలిపారు. ఈ నెల 16న విజయవాడ నడిబొడ్డున ఉపాధ్యాయులు భారీ ర్యాలీ నిర్వహించనున్నారని చెప్పారు.
‘జెన్‌ జీ ఉద్యమాలు’ పేరుతో 50, 60 ఏళ్ల వయసున్న వారితో వైసీపీ ఉద్యమాలు చేయిస్తోందంటూ కేశినేని చిన్ని సెటైర్ వేశారు. ఈ ర్యాలీలను చూసైనా జగన్ బుద్ధి తెచ్చుకోవాలని హితవు పలికారు.

ఏపీపీఎస్సీ అంశాన్ని పక్కదారి పట్టిస్తున్నారని ఆరోపణ

ఏపీపీఎస్సీలో జరిగిన అక్రమాలపై చర్చ జరగకుండా డైవర్ట్ చేసేందుకే డీఎస్సీలో అవకతవకలు జరిగాయంటూ వైసీపీ ఆరోపణలు చేస్తోందని కేశినేని చిన్ని అన్నారు.
జెన్‌ జీ యువత అంతా నారా లోకేశ్, పవన్ కల్యాణ్ వెంట ఉందని పేర్కొన్నారు. జగన్ నిర్వహిస్తున్న ర్యాలీల్లో పాల్గొంటున్న వారి వయసును చూసి పార్లమెంట్‌లో ఉన్నవారు కూడా నవ్వుకుంటున్నారని ఎద్దేవా చేశారు.జగన్ ఎన్ని ఆరోపణలు చేసినా.. అసెంబ్లీ వేదికగా ఏపీపీఎస్సీలో జరిగిన అక్రమాలపై చర్చించి తీరుతామని ఎంపీ కేశినేని శివనాథ్ స్పష్టం చేశారు.