విశాఖపట్నం, ఆగస్టు 13 (ప్రతి ఉదయం ప్రతినిధి): ఏనుగులు భారతదేశ వన్యప్రాణి వారసత్వానికి ప్రతీకలని ఆంధ్రప్రదేశ్ ఉప ముఖ్యమంత్రి పవన్ కల్యాణ్ అన్నారు. అడవుల సంరక్షణతో పాటు పర్యావరణ సమతుల్యతలో ఏనుగులు కీలక పాత్ర పోషిస్తున్నాయని తెలిపారు. ప్రధానమంత్రి నరేంద్ర మోదీ నాయకత్వంలో దేశంలో ఏనుగుల సంరక్షణకు ప్రభుత్వం అత్యధిక ప్రాధాన్యం ఇస్తోందని పేర్కొన్నారు.విశాఖపట్నంలోని రాడిసన్ బ్లూ హోటల్లో గురువారం నిర్వహించిన వరల్డ్ ఎలిఫెంట్ డే కార్యక్రమంలో కేంద్రమంత్రి కీర్తి వర్ధన్ సింగ్, డిప్యూటీ సీఎం పవన్ కల్యాణ్, అటవీ శాఖ ఉన్నతాధికారులు పాల్గొన్నారు. ఈ సందర్భంగా పవన్ కల్యాణ్ మాట్లాడారు.
‘ప్రాజెక్ట్ ఎలిఫెంట్’ను మరింత బలోపేతం చేస్తామని పవన్ కల్యాణ్ తెలిపారు. ఏనుగుల కారిడార్ల రక్షణ, సాంకేతిక పరిజ్ఞానంతో పర్యవేక్షణపై ప్రత్యేక దృష్టి పెట్టామని చెప్పారు.
ఏపీలో 132 నుంచి 142 ఏనుగులు
ఆంధ్రప్రదేశ్లో సుమారు 132 నుంచి 142 అడవి ఏనుగులు ఉన్నాయని పవన్ కల్యాణ్ వెల్లడించారు. వాటి సంరక్షణ మనకు గర్వకారణమే కాకుండా బాధ్యత కూడా అని అన్నారు.
మనిషి–ఏనుగు ఘర్షణలను తగ్గించేందుకు ఏపీ, కర్ణాటక అటవీ శాఖల మధ్య సహకారం కొనసాగుతోందని తెలిపారు. కర్ణాటక అటవీ శాఖ సహకారంతో ఏపీకి నాలుగు కుంకీ ఏనుగులు అందాయని చెప్పారు. వాటి కోసం ప్రత్యేక శిక్షణా కేంద్రాన్ని ఏర్పాటు చేసినట్లు వెల్లడించారు.
కుంకీ ఏనుగుల సహాయంతో ఇప్పటికే 15 మనిషి–ఏనుగు ఘర్షణ నియంత్రణ ఆపరేషన్లు నిర్వహించామని తెలిపారు. తద్వారా ఏనుగుల కారణంగా జరిగే మానవ ప్రాణనష్టాన్ని గణనీయంగా తగ్గించగలిగామని పవన్ పేర్కొన్నారు.
వన్యప్రాణుల రక్షణకు 100 ప్రత్యేక వాహనాలు
వన్యప్రాణుల రక్షణ కోసం 100 ప్రత్యేక వాహనాలను అందుబాటులోకి తీసుకువచ్చామని పవన్ కల్యాణ్ తెలిపారు. ఇప్పటివరకు 200కు పైగా వన్యప్రాణులను రక్షించినట్లు వెల్లడించారు.
రైతులకు సకాలంలో హెచ్చరికలు అందించడం, అటవీ సిబ్బందికి ఆధునిక పరికరాలు, శిక్షణ అందించడం, వన్యప్రాణులకు సురక్షితమైన ఆవాసాలను కల్పించడం తమ ప్రధాన లక్ష్యాలని తెలిపారు.
ప్రజలను భాగస్వామ్యం చేయాలి
వన్యప్రాణుల సంరక్షణ ప్రభుత్వం ఒక్కదాని బాధ్యత కాదని పవన్ కల్యాణ్ అన్నారు. ప్రజలను భాగస్వామ్యం చేసి వన్యప్రాణుల సంరక్షణను ప్రజా ఉద్యమంగా మార్చాలని సూచించారు.
ఏనుగుల సంరక్షణపై దేశవ్యాప్తంగా నిర్వహించిన అవగాహన కార్యక్రమాల్లో 21,450 పాఠశాలల విద్యార్థులు పాల్గొన్నారని తెలిపారు. వారి చైతన్యాన్ని అభినందించారు. అభివృద్ధికి బాధ్యత ఉండాలని, సంరక్షణకు లక్ష్యం ఉండాలని పవన్ కల్యాణ్ పేర్కొన్నారు.
