ఇంటర్నెట్ డెస్క్, ఆగస్టు 13 (ప్రతి ఉదయం ప్రతినిధి): ఉత్తరాఖండ్‌లోని రామ్‌లీలా గ్రౌండ్‌లో తన ర్యాలీ అనంతరం శుద్ధీకరణ కార్యక్రమం నిర్వహించడంపై కాంగ్రెస్ అధ్యక్షుడు మల్లికార్జున్ ఖర్గే తీవ్ర ఆగ్రహం వ్యక్తం చేశారు. ఈ ఘటన భారత్‌లో దళితుల పట్ల వివక్షకు నిదర్శనమని ఆయన ఆరోపించారు.‘మేమెప్పటి నుంచో ఇదే విషయాన్ని చెబుతున్నాం. మతం పేరుతో ప్రజల మధ్య విభజనలు సృష్టిస్తున్నారు. ఈ దేశంలో దళితులకు స్థానం లేదా? రామ్‌లీలా మైదానంలో శుద్ధీకరణ పేరుతో హోమం నిర్వహించాల్సిన అవసరం ఏముంది?’ అని ఖర్గే ప్రశ్నించారు.

‘ఇది హిందూ మతానికి వ్యతిరేకం’

రామ్‌లీలా మైదానం ప్రజాసమావేశాల కోసం ఉద్దేశించిన వేదిక అని ఖర్గే అన్నారు. అన్ని రాజకీయ పార్టీలు అక్కడ సమావేశాలు నిర్వహిస్తాయని పేర్కొన్నారు. అక్కడ శుద్ధీకరణ కార్యక్రమం నిర్వహించడం హిందూ మతానికి వ్యతిరేకమని వ్యాఖ్యానించారు.వివిధ వర్గాల మధ్య వివాదాలు సృష్టించి దేశంలో చీలికలు తీసుకురావడానికి ఇలాంటి చర్యలు కారణమవుతున్నాయని ఖర్గే ఆరోపించారు.

రాజ్యసభలోనూ ప్రస్తావన

ఈ అంశాన్ని ఖర్గే పార్లమెంట్‌లోనూ లేవనెత్తారు. తాను రామ్‌లీలా మైదానంలో ఏ రాజకీయ పార్టీని విమర్శించలేదని, అయినప్పటికీ తన ర్యాలీ అనంతరం బీజేపీ శుద్ధీకరణ కార్యక్రమం నిర్వహించిందని ఆరోపించారు.దీనిపై రాజ్యసభలో బీజేపీ ఎంపీ జేపీ నడ్డా స్పందించారు. ఈ కార్యక్రమం జరగడం దురదృష్టకరమని పేర్కొన్నారు. శుద్ధీకరణ కార్యక్రమంలో తమ పార్టీకి చెందిన ఎవరూ పాల్గొనలేదని స్పష్టం చేశారు. ఘటనపై విచారణ జరుపుతామని హామీ ఇచ్చారు.

ర్యాలీ అనంతరం హోమం

శనివారం ఉత్తరాఖండ్‌లోని హల్ద్వానీ మైదానంలో ‘విజయ్ శంఖనాద్’ పేరుతో నిర్వహించిన ర్యాలీలో ఖర్గే పాల్గొని ప్రసంగించారు. ఆ తర్వాత రెండు రోజులకే.. ఆగస్టు 10న శ్రీరామ సేన అనే సంస్థ రామ్‌లీలా గ్రౌండ్‌లో శుద్ధీకరణ హోమం నిర్వహించినట్లు జాతీయ మీడియా కథనాలు వెలువడ్డాయి. దీంతో ఈ వ్యవహారం రాజకీయంగా తీవ్ర వివాదానికి దారితీసింది.