అమరావతి, ఆగస్టు 12 (ప్రతి ఉదయం ప్రతినిధి): రాష్ట్రంలో శాంతిభద్రతల పరిరక్షణపై ఆంధ్రప్రదేశ్ ముఖ్యమంత్రి నారా చంద్రబాబు నాయుడు ఉన్నతస్థాయి సమీక్ష నిర్వహించారు. వివిధ పోలీస్ స్టేషన్లలో నమోదవుతున్న కేసులు, చట్టాన్ని చేతుల్లోకి తీసుకునే వారిపై కఠినంగా వ్యవహరించాలని పోలీసు అధికారులను ఆదేశించారు.

బుధవారం సచివాలయం నుంచి నిర్వహించిన ఈ సమావేశంలో రాష్ట్రంలో శాంతిభద్రతల పరిస్థితి, పోలీస్ స్టేషన్ల పనితీరు, నేరాల నియంత్రణకు తీసుకుంటున్న చర్యలపై సీఎం సమీక్షించారు. క్షేత్రస్థాయిలో పోలీసింగ్ మరింత పటిష్ఠంగా ఉండేలా అధికారులకు పలు కీలక సూచనలు చేశారు.

1650 మంది పోలీసు అధికారుల హాజరు

ఈ ఉన్నతస్థాయి సమావేశానికి డీజీపీ నుంచి స్టేషన్ హౌస్ ఆఫీసర్ల వరకు రాష్ట్రవ్యాప్తంగా పోలీసు అధికారులు హాజరయ్యారు. హోంమంత్రి వంగలపూడి అనిత, డీజీపీ హరీశ్ కుమార్ గుప్తా, ఇతర ఉన్నతాధికారులు సమావేశంలో పాల్గొన్నారు.

వర్చువల్ విధానంలో రేంజ్ ఐజీలు, డీఐజీలు, జిల్లాల ఎస్పీలు, డీఎస్పీలు, ఇన్‌స్పెక్టర్లు, ఎస్‌ఐలు సమావేశానికి హాజరయ్యారు. రాష్ట్రవ్యాప్తంగా 1200కు పైగా పోలీస్ స్టేషన్ల నుంచి ఎస్‌హెచ్‌ఓలు సహా మొత్తం 1650 మంది అధికారులు పాల్గొన్నారు.

నేరాల నియంత్రణపై ప్రత్యేక దృష్టి

శాంతిభద్రతల పరిరక్షణతో పాటు మహిళలు, చిన్నారులపై నేరాల నియంత్రణకు ప్రాధాన్యత ఇవ్వాలని సీఎం చంద్రబాబు సూచించారు. సైబర్ నేరాలను అరికట్టేందుకు మరింత సమర్థవంతంగా పనిచేయాలని ఆదేశించారు.

అలాగే బ్లేడ్ బ్యాచ్‌లు, గంజాయి బ్యాచ్‌ల ఆగడాలకు అడ్డుకట్ట వేయాలని, అసాంఘిక కార్యకలాపాలకు పాల్పడే వారిపై కఠిన చర్యలు తీసుకోవాలని స్పష్టం చేశారు. సోషల్ మీడియాలో జరుగుతున్న ఫేక్ ప్రచారాన్ని నియంత్రించడంపైనా పోలీసులు ప్రత్యేక దృష్టి పెట్టాలని సీఎం సూచించారు.

రాష్ట్రవ్యాప్తంగా పోలీస్ స్టేషన్ల పనితీరును ఎప్పటికప్పుడు పర్యవేక్షిస్తూ.. ప్రజలకు మెరుగైన పోలీస్ సేవలు అందేలా క్షేత్రస్థాయి అధికారులు బాధ్యతగా పనిచేయాలని చంద్రబాబు దిశానిర్దేశం చేశారు.